آخرت

آخرت

تحریر : مفتی محمد آصف اقبال قاسمی 

 ایمان کے بنیادی اجزا ء میں سے ایک اہم جزء آخرت پرایمان ہے آخرت پرایمان لانے کامطلب یہ ہے کہ ایک مومن اس بات کایقین محکم رکھے کہ یہ دنیا اوراس میں جوکچھ بھی ہے یہ سب ایک دن ختم ہوجانے والے ہیں ا س کے بعد پھر ایک دوسری زندگی کاآغاز ہوگاجس کی بنیاد ہماری اسی پہلی زندگی پرقائم ہوگی یعنی دنیاوی زندگی شر سے بھری ہوئی ہے تو اخروی زندگی میں ا س کے ثمرات ویسے ہی ہوں گے اوراگریہ زندگی خیر سے معمور ہے تو آخرت کی زندگی کے ثمرات و نتائج بھی ایسے ہی ہوں گے۔شر کاثمرہ جہنم،ا س کاعذاب اور اللہ رب العزت کی ناراضی ہوگی اورخیر کاثمرہ جنت،اس کی نعمتیں اور اللہ رب العزت کی رضامندی ہوگی۔ اس لئے ایک بندۂ مومن کو یہ عقیدہ رکھنا لازمی ہے کہ ایک دن ایساہے جس میں ہمارے تمام اعمال تولے جائیں گے اور اللہ رب العزت ان کی جزا یا سز ا تجویز فرمائیں گے۔

آخرت کا یقین فلاح کی ضمانت

 آخرت کایقین ہی ایک آدمی کو خیر پرآمادہ اور شر سے بیزار کرسکتاہے ورنہ انسان بے لگام ہوکر جوچاہے کرتاپھرے گا۔ قرآن کریم کی تعلیمات اورنبی کریم ؐ کے ارشادات امور آخرت کے بیان سے بھرے پڑے ہیں۔ آخرت پرایمان انسان کو نیک اعمال پرابھارتاہے اور برے اعمال سے بچنے پرآمادہ کرتاہے اس لئے بندۂ مومن کو ہمیشہ یہ یاد رکھناچاہئے کہ اسے ایک دن اپنے رب کے سامنے جوابدہ ہونا ہے اوراپنے کئے ہوئے اعمال کی جزا یا سزا پاناہے۔اللہ تعالیٰ نے سورۂ  بقرہ کی ابتدائی آیات میں متقین کی صفات بیان کرتے ہوئے فرمایا ہے وَالَّذِیْنَ یُؤْمِنُوْنَ بِمَا اُنْزِلَ اِلَیْکَ وَمَا اُنْزِلَ مِنْ قَبْلِکَ وَبِالْآخِرَۃِ ھُمْ یُوْقِنُوْنَ (اورجولوگ اس پرایمان لائے جو آپ پر اتارا گیا اور اس پر جو آپ سے پہلے(انبیاء) پراتارا گیا اوروہ آخرت پربھی یقین رکھتے ہیں)۔یعنی ہمارے نبی حضرت محمد رسول للہ ﷺ پراور ان سے پہلے جتنے انبیاء کرام پر جوکتابیں نازل کی گئیں ان سب پر ایمان لانے والے ہی دراصل متقین ہیں اورآخرت پرایمان جو تمام انبیاء علیہم الصلوۃ والسلام کی تعلیم میں شامل رہاہے اس پر بھی ایمان لانا ضروری ہے۔ تب ہی جاکر ایمان کی تکمیل ہوسکتی ہے اور یہی لوگ ہدایت یافتہ اورکامیاب ہوں گے جیساکہ آگے اللہ تعالیٰ نے فرمایا اُوْلٰئِکَ عَلٰی ھُدًی مِّنْ رَّبِّھِمْ وَاُوْلٰئِکَ ھُمُ الْمُفْلِحُوْنَ (وہی لوگ اپنے رب کی طرف سے ہدایت پرہیں او ر وہی لوگ کامیاب ہیں)

یوم آخرت

 ایک مومن کو یہ ایمان رکھناچا ہئے کہ ہماری اس موجودہ زندگی کے تمام ہونے کے بعد ایک دن ایسا ہے کہ ہمیں اپنے پروردگار کے سامنے حاضر ہوناہے جسے اللہ تعالیٰ نے کہیں آخرت اور کہیں یوم الدین سے تعبیر کیاہے۔وہ دن ایسا ہے کہ اللہ تعالیٰ کی ملکیت،مالکیت اور بادشاہت ہر مومن وکافر پر کھل کر سامنے آجائے گی۔عارضی ملکیت و بادشاہت جواللہ تعالیٰ نے انسانوں کوچند دنوں کے لئے اس دنیا میں دے رکھی ہے وہ سب ختم ہوجائے گی اور  ا لٰہِ واحد خالق السماوات والارض کی بادشاہت کو سب لوگ اپنی نظروں سے دیکھ لیں گے۔اس دن کے بارے میں اللہ تعالیٰ نے فرمایا : مَالِکِ یَوْمِ الدِّینِ یعنی اللہ تعالیٰ ہی روز جزا کے مالک ہیں۔ وہ دن ایساہوگاکہ ساری آوازیں پست ہوجائیں گی اور گنگناہت کے سوا کچھ سنائی نہیں دے گا:اس دن کے بارے میں اللہ تعالیٰ کاارشاد ہے:

یَومَءِذٍ یَّتَّبِعُونَ الدَّاعِیَ لَا عِوَجَ لَہٗ وَ خَشَعَتِ الاَصوَاتُ لِلرَّحمٰنِ فَلَا تَسمَعُ اِلَّاھَمسًا(١٠٨ )یَومَءِذٍ لَّا تَنفَعُ الشَّفَاعَۃُ  اِلَّا مَن اَذِنَ لَہُ الرَّحمٰنُ وَ رَضِیَ لَہٗ قَولًا (١٠٩ ) یَعلَمُ مَا بَینَ اَیدِیھِم وَ مَا خَلفَھُم وَ لَا یُحِیطُونَ بِہٖ عَلمًا(١١٠ )وَ عَنَتِ الوُجُوہُ لِلحَیِّ القَیُّومِ وَ قَد خَابَ مَن حَمَلَ ظُلمًا(١١١ ) وَ مَن یَّعمَل مِنَ الصّٰلِحٰتِ وَ ھُوَ مُؤمِنٌ فَلَا یَخٰفُ ظُلمًا وَّ لَا ھَضمًا(١١٢ ۔طٰہٰ)

ترجمہ:    اس دن وہ پکارنے والے کے پیچھے چلے آئیں گے، جس کے لیے کوئی کجی نہ ہوگی اور سب آوازیں رحمن کے لیے پست ہو جائیں گی، سو تو ایک نہایت آہستہ آواز کے سوا کچھ نہیں سنے گا۔ اس دن سفارش نفع نہ دے گی مگر جس کے لیے رحمن اجازت دے اور جس کے لیے وہ بات کرنا پسند فرمائے۔ وہ جانتا ہے جو ان کے سامنے ہے اور جو ان کے پیچھے ہے اور وہ علم سے اس کا احاطہ نہیں کرسکتے اور سب چہرے اس زندہ رہنے والے، قائم رکھنے والے کے لیے جھک جائیں گے اور یقینا ناکام ہوا جس نے بڑے ظلم کا بوجھ اٹھایا اور جو شخص کچھ نیک اعمال کرے اور وہ مومن ہو تو وہ نہ کسی بے انصافی سے ڈرے گا اور نہ حق تلفی سے۔

اس دن مقربین ملائکہ بھی صف باندھے رحمن کے کے سامنے کھڑے ہوں گے اور اس کی اجازت کے بغیر کسی کو بولنے کی جرأت نہیں ہوگی۔ہرشخص کاعمل اس کے سامنے آجائے گا۔ارشاد باری تعالیٰ ہے:

رَبِّ السَّمٰوٰتِ وَالْاَرْضِ وَمَا بَیْنَہُمَا الرَّحْمٰنِ لاَ یَمْلِکُوْنَ مِنْہُ خِطَابًا (37) یَوْمَ یَقُوْمُ الرُّوْحُ وَالْمَلٰٓءِکَۃُ صَفًّا لاَّ یَتَکَلَّمُوْنَ اِِلَّا مَنْ اَذِنَ لَہُ الرَّحْمٰنُ وَقَالَ صَوَابًا (38)ذٰلِکَ الْیَوْمُ الْحَقُّ فَمَنْ شَآءَ اتَّخَذَ اِِلٰی رَبِّہٖ مَآبًا (39)اِِنَّا اَنذَرْنٰکُمْ عَذَابًا قَرِیْبًا یَّوْمَ یَنْظُرُ الْمَرْءُ مَا قَدَّمَتْ یَدٰہُ وَیَقُوْلُ الْکٰفِرُ یٰ لَیْتَنِیْ کُنْتُ تُرَابًا (٤٠ ۔نبا)

ترجمہ:    (اس رب کی طرف سے) جو آسمانوں اور زمین اور ان کے درمیان کی ہر چیز کا رب ہے، بیحد رحم والا، وہ اس سے کوئی بات کرنے کی قدرت نہیں رکھیں گے۔ جس دن روح اور فرشتے صف بنا کر کھڑے ہوں گے، وہ کلام نہیں کریں گے، مگر وہی جسے رحمن اجازت دے گا اور وہ درست بات کہے گا۔ یہی دن ہے جو حق ہے، پس جو چاہے اپنے رب کی طرف لوٹنے کی جگہ بنا لے۔ بلاشبہ ہم نے تمھیں ایک ایسے عذاب سے ڈرا دیا ہے جو قریب ہے، جس دن آدمی دیکھ لے گا جو اس کے دونوں ہاتھوں نے آگے بھیجا اور کافر کہے گا اے کاش کہ میں مٹی ہوتا۔

 ایک جگہ ارشاد ہے:

اِنَّ فِیْ ذٰلِکَ لَاٰیَۃً لِّمَنْ خَافَ عَذَابَ الْاٰخِرَۃِ ذٰلِکَ یَوْمٌ مَّجْمُوْعٌ لَّہُ النَّاسُ وَ ذٰلِکَ یَوْمٌ مَّشْھُوْدٌ(١٠٣ )وَ مَا نُؤَخِّرُہٗٓ اِلَّا لِاَجَلٍ مَّعْدُوْدٍ(١٠٤ )یَوْمَ یَاْتِ لَا تَکَلَّمُ نَفْسٌ اِلَّا بِاِذْنِہٖ فَمِنْھُمْ شَقِیٌّ وَّ سَعِیْدٌ(١٠٥ ) فَاَمَّا الَّذِیْنَ شَقُوْا فَفِی النَّارِ لَھُمْ فِیْھَا زَفِیْرٌ وَّ شَھِیْقٌ(١٠٦ )خٰلِدِیْنَ فِیْھَا مَا دَامَتِ السَّمٰوٰتُ وَ الْاَرْضُ اِلَّا مَاشَآءَ رَبُّکَ اِنَّ رَبَّکَ فَعَّالٌ لِّمَا یُرِیْدُ(١٠٧ )وَ اَمَّا الَّذِیْنَ سُعِدُوْا فَفِی الْجَنَّۃِ خٰلِدِیْنَ فِیْھَا مَا دَامَتِ السَّمٰوٰتُ وَ الْاَرْضُ اِلَّا مَاشَآءَ رَبُّکَ عَطَآءً غَیْرَ مَجْذُوْذٍ(١٠٨ ۔ھود)

ترجمہ:    بے شک اس میں اس شخص کے لیے یقینا ایک نشانی ہے جو آخرت کے عذاب سے ڈرے، یہ وہ دن ہے جس کے لیے (سب) لوگ جمع کیے جانے والے ہیں اور یہ وہ دن ہے جس میں حاضری ہو گی۔اور ہم اسے مؤخر نہیں کر رہے، مگر ایک گنے ہوئے وقت کے لیے۔ جس دن وہ (وقت) آئے گا، کوئی شخص اس کی اجازت کے سوا بات نہیں کرے گا، پھر ان میں سے کوئی بد بخت ہوگا اور کوئی خوش قسمت۔

 اس دن اللہ تعالیٰ پوری خلقت سے سوال کریں گے  لِمَنِ الْمُلْکُ الْیَوْمُ   آج بادشاہت کس کی ہے اور پھر خود ہی جواب دیں گے لِلّٰہِ الْوَاحِدِ الْقَہَّارِ۔اس دن اللہ تعالیٰ ہر ایک کے کئے کا بدلہ دیدیں گے۔

قرآن کریم میں اللہ تعالیٰ نے جگہ جگہ آخرت کا تذکرہ کیا ہے اور انسان کے  ذہن ودماغ میں پیداہونے والے شکوک وشبہات کو رفع کیا ہے کہ تم یہ نہ سوچو کہ جب ہڈیاں گل جائیں اور انسان مٹی ہوجائے گاتو پھرکیسے دوبارہ زندہ ہوکر اپنے رب کے سامنے حاضر ہوگا؟ اس لئے کہ جس خالق مطلق نے انسان کواس وقت پیدا کیا جب کہ وہ کچھ بھی نہ تھا تو اب دوبارہ اسے زندہ کرنے میں کیا شبہہ ہے۔سورہ قیامہ میں باری تعالیٰ کاارشاد ہے:اَیَحْسَبُ الْاِنْسَانُ اَنْ یُّتْرَکَ سُدًی(کیا انسان یہ سمجھتاہے کہ اسے یوں ہی مہمل چھوڑ دیا جائے گا۔) اس آیت کریمہ بلکہ پوری سورہ قیامہ میں اللہ تعالیٰ نے آخرت کے امور ہی بیان فرمائے ہیں اوراللہ تعالیٰ نے فرمایا ایک دن ایساآنے والا ہے کہ ہم انسان کی ہڈیوں بلکہ اس کے پورؤں تک کوجمع کرکے اسے دوبارہ زندہ کرنے پرقادر ہیں اور ہم ایساکریں گے۔

 اس سورت کی ابتدائی آیات کاشان نزول امام بغوی نے بیان فرمایاہے کہ یہ آیت اَیَحْسَبُ الْاِنْسَانُ اَنْ لَّنْ  نَجْمَعَ عِظَامَہٗ (کیاانسان یہ خیال کرتاہے کہ ہم ہرگز جمع نہ کریں گے اس کی ہڈیوں کو) عدی بن ربیع کے بارے میں نازل ہوئی جو اخنس بن شریق کاداماد بھی تھا، حضور پاکؐ یہ دعاکیاکرتے تھے  اَللّٰھُمَّ اکْفِنِیْ جَارِیَ السُّوْءِ اے اللہ مجھے برے پڑوسیوں سے محفوظ رکھ۔ اس کی وجہ یہ تھی کہ عدی ابن ربیعہ ایک بار حضور اکرمؐ کی خدمت میں حاضر ہوا اور عرض کیاکہ مجھے قیامت سے متعلق کچھ بتائیے کہ کب واقع ہوگی اس کی حقیقت کیا ہوگی؟ نبی کریمؐ نے جب اسے قیامت کے متعلق بتایاتو اس نے کہاکہ میں اگر اس دن کودیکھ لوں تب بھی میں اس کی تصدیق نہ کروں گا اورنہ میں تمہارے اوپر ایمان لاؤں گاکہ اللہ تعالیٰ ہڈیوں کو جمع فرمائے گا اس پریہ آیت کریمہ نازل ہوئی۔ جس میں اللہ تعالیٰ نے یہ فرمایا کہ یہ انسان کی خام خیالی ہے کہ جب ہڈیاں بوسیدہ ہوجائیں گی توکیسے اللہ تعالیٰ ان کو جمع کر کے انسان کی صورت عطا کرے گا بلکہ ہم نے جب اس کو عدم سے وجود بخشا تو یقیناً اس بات پر بھی قادر ہیں کہ اسے دوبارہ زندہ کردیں۔(افادات: از تفسیر مظہری ج ۰۱ ص ۳۶۱۔تفسیر بغوی اردو۔ج  ۶ ص ۹۰۴(

مرنے کے بعد زنہ اٹھائے جانے سے متعلق اللہ تعالیٰ نے قرآن کریم میں بے  بار بار دلائل دیئے ہیں اور  پوری  انسانیت کو یہ بات ہر طرح سے سمجھانے کی کوشش کی ہے کہ تم اگر یہ سمجھ رہے ہو کہ مرنے کے بعد تمہیں دوبارہ زندہ کرنے اللہ تعالیٰ کے لئے ممکن نہیں تو  یہ تمہاری خام خیالی ہے ۔ آئے دن روزمرہ کے واقعات یہ بتاتے ہیں کہ اللہ کی قدر سے ہر روز مردے زندہ ہورہے ہیں اور سب کی آنکھوں کے سامنے  ہورہے ہیں  لیکن غورنے کرنے والے اس پر غور نہیں کرتے ۔ بارش کی ایک مثال لے لیجئے ۔ جب زمین بالکل سوکھ جاتی ہے اور زمین کی خوبصورتی پیر پودے اور  گھاس پھوس سب جل جاتے ہیں اللہ تعالیٰ آسمان سے بارش  برساتے ہیں تو دیکھتے ہیں دیکھتے وہ سارے پودے جن کی جڑیں سوکھ چکی ہوتی ہیں ایک دم سے لہلہا اٹھتی ہیں  اور گویا ان کی جان واپس آجاتی ہے اور پہلے سے زیادہ سبز و شاداب ہوجاتے ہیں۔ کیڑے مکوڑے جنہیں حشرات الارض کہا جاتا ہے نہ جانے کہاں سے یکدم زمین پر رینگتےہوئے نظر آنے لگتے ہیں ۔ سورہ فاطر میں اللہ تعالیٰ کا  ارشاد ہے :

وَاللَّهُ الَّذِي أَرْسَلَ الرِّيَاحَ فَتُثِيرُ سَحَابًا فَسُقْنَاهُ إِلَى بَلَدٍ مَيِّتٍ فَأَحْيَيْنَا بِهِ الْأَرْضَ بَعْدَ مَوْتِهَا كَذَلِكَ النُّشُورُ(٩ )

اور اللہ ہی ہے جس نے ہواؤ ں کو بھیجا، پھر وہ بادل کو ابھارتی ہیں، پھر ہم اسے ایک مردہ شہر کی طرف ہانک کر لے جاتے ہیں، پھر ہم اس کے ساتھ زمین کو اس کی موت کے بعد زندہ کر دیتے ہیں، اسی طرح اٹھایا جانا ہے۔ 

جس  طرح بارش کے ذریعہ مردہ زمین میں جان آجاتی ہے اسی طرح انسانی ہڈیوں کے گل سرجانے اورمٹی میں مل جانے کے باوجود اللہ تعالیٰ اس بات پر قادر ہیں کہ ایک لمحے میں اسے زندہ کردیں ۔

سورہ زمر میں ارشاد ہے:

وَنُفِخَ فِي الصُّورِ فَصَعِقَ مَنْ فِي السَّمَاوَاتِ وَمَنْ فِي الْأَرْضِ إِلَّا مَنْ شَاءَ اللَّهُ ثُمَّ نُفِخَ فِيهِ أُخْرَى فَإِذَا هُمْ قِيَامٌ يَنْظُرُونَ۔(٦٨ ) 

اور صور میں پھونکا جائے گا تو جو لوگ آسمانوں میں اور جو زمین میں ہوں گے، مر کر گر جائیں گے مگرجسے اللہ نے چاہا، پھر اس میں دوسری دفعہ پھونکا جائے گا تو اچانک وہ کھڑے دیکھ رہے ہوں گے۔

جب  قیامت کے دن صور پھونکا جائے گا کائنات میں   پائی جانے والی ہر زندگی ختم ہوجائے گی  یہاں تک کہ اللہ تعالیٰ کے مقرب فرشتے  اور خود صور پھونکنے والے  اسرافیل کو بھی اس دن موت آجائے گی پھر اللہ تعالیٰ کا امر کام کرے گا اور باری تعالیٰ کا ارشاد ہوگا لمن الملک الیوم   کہ آج کس کی بادشاہت ہے اور کون حاکم اعلیٰ  ہے پھرخود ہی فرمائیں للہ الواحد القہار کہ صرف ایک اللہ کی حکومت و بادشاہت ہے جو اپنی  الوہیت میں بھی یکتاہے اور طاقت وقدرت میں بھی ۔ پھر اللہ تعالیٰ اسرافیل ؑ کو زندہ کریں گے اور صور پھونکنے کا حکم دیں گے ۔ حضرت اسرافیل ؑ جیسے ہی صور پھونکیں گے اس وقت وہ لوگ بھی جو صور پھونکنے سے مرے تھے اور وہ لوگ بھی جو پہلے سے مرے ہوئے تھے تمام کے تمام یکبارگی زندہ ہوجائیں گے  اور کھڑے ہوکر حیرت سے یہ سب نظارہ دیکھتے  رہ جائیں گے اسی کی منظر کشی مذکورہ بالا آیت میں کی گئی ہے۔

صور سے متعلق رسول اللہ ﷺ کا ارشاد ہے :

 عن ابی ھریرۃ رضی اللہ عنہ عَنِ النَّبِيِّ صَلَّى اللَّهُ عَلَيْهِ وَسَلَّمَ قَالَ:” بَيْنَ النَّفْخَتَيْنِ أَرْبَعُونَ”، قَالُوا: يَا أَبَا هُرَيْرَةَ، أَرْبَعُونَ يَوْمًا؟ قَالَ: أَبَيْتُ، قَالَ: أَرْبَعُونَ سَنَةً، قَالَ: أَبَيْتُ، قَالَ: أَرْبَعُونَ شَهْرًا، قَالَ: أَبَيْتُ، وَيَبْلَى كُلُّ شَيْءٍ مِنَ الْإِنْسَانِ إِلَّا عَجْبَ ذَنَبِهِ فِيهِ يُرَكَّبُ الْخَلْقُ. ۔( صحیح بخاری  کتاب تفسیر القرآن باب قولہ وَنُفِخَ فِي الصُّورِ فَصَعِقَ مَنْ فِي السَّمَوَاتِ الخ ۔حدیث نمبر ٤٨١٤ )

حضرت ابو ہریرہ  رضی اللہ عنہ سے روایت ہے کہ رسول اللہ ﷺ نے  فرمایا کہ دونوں صوروں کے پھونکے جانے کا درمیانی عرصہ چالیس ہے۔ ابوہریرہ رضی اللہ عنہ کے شاگردوں نے پوچھا: کیا چالیس دن مراد ہیں؟ انہوں نے کہا کہ مجھے معلوم نہیں پھر انہوں نے پوچھا: چالیس سال؟ اس پر بھی انہوں نے انکار کیا۔ پھر انہوں نے پوچھا: چالیس مہینے؟ اس کے متعلق بھی انہوں نے کہا کہ مجھ کو خبر نہیں اور ہر چیز فنا ہو جائے گی، سوا ریڑھ کی ہڈی کے کہ اسی سے ساری مخلوق دوبارہ بنائی جائے گی بہر حال ایک مومن کے لئے یہ ضروری ہے کہ وہ اس بات پر بھی ایمان لائے کہ آخرت اور اس میں پیش آنے والے جتنے امور اللہ تعالیٰ اور اس کے رسول ؐ نے بتائے ہیں وہ تمام کے تمام برحق ہیں اور ان میں کہیں بھی شک و شبہہ کی گنجائش نہیں ہے۔یہ یقین جتنا پختہ ہوگا ایمان اتنا ہی مضبوط ہوگا اور اعمال خیر کی توفیق بھی اسی قدر ہوگی۔